ज्योतिष भविष्यवाणी मेडियाको वर्ष उत्कृष्ट सम्मान

डा. मधु रेग्मी/आनन्द रेग्मी
ज्योतिष भविष्यवाणी मेडिया प्रा.लि. पोखरा–२ ले आफ्नो सञ्चार संस्थामा आवद्ध पत्रकारलाई वि.सं. २०७८ सालको वर्ष सम्मान अर्पण गरेको छ ।

ज्योतिष भविष्यवाणी साप्ताहिक तथा अनलाइन मेडिया प्रा.लि.को वार्षिक सम्मान अन्तर्गत छापा तथा अनलाइनमाध्यमका विभिन्न पाँच विधामा उत्कृष्ट पत्रकारलाई एक समारोहका बीच उक्त सम्मान अर्पण गरिएको हो ।

मेडियाले अघिल्लो वर्षसम्मको प्रेसतर्फ उत्कृष्ट प्रेसकारुपमा पोखरा–६ जरेवरस्थित सम्पूर्ण प्रिन्टिङ्ग प्रेसका सञ्चालक राजबहादुर थापा, २०७८ सालको वर्ष उत्कृष्ट प्रेसतर्फ, पोखरा–३ नदीपुरस्थित आदर्श अŠसेट प्रिन्टर्सका सञ्चालक हरिहर खनियाँ/सावित्री पौडेल खनियाँ, रेडियो ज्योतिष पत्रकारितातर्फ एभरेष्ट एफएम ९३ मेगाहर्जका प्राविधिक प्रमुख दिलु गुरुङ, jbweekly.com अनलाइन संस्करणतर्फ वेवपेज नेपालका सञ्चालक स्वतन्त्र पत्रकार पितम सेन ठकुरी र राशिफल लेखकतर्फ साहित्यकार पत्रकार असफल गौतमलाई सम्मान अर्पण गरेको छ ।

कार्यक्रमका सभाध्यक्ष मेडिया प्रा.लि.का संस्थापक अध्यक्ष तथा सम्पादक प्रा.डा. बलराम उपाध्याय रेग्मीले छनौट भएका प्रतिभालाई जनही पाँच हजार एकसय राशिसहित सम्मान अर्पण गर्नुभयो । सम्मानित प्रतिभा राजबहादुर थापाले सम्मानले आँफूलाई हौसला मिलेको बताउनु भयो ।

अन्य सम्मानित स्रष्टाले पनि प्रा.लि.प्रति आभार व्यक्त गर्दै आगामी दिनमा यसको गौरव र गरिमा बढाउनका लागि थप क्रियाशील रहने प्रतिबद्धता व्यक्त गर्नुभयो । सभाध्यक्ष रेग्मीले आफ्नो नाफाको जिन्दगी भएकाले ज्योतिष भविष्यवाणीबाट आएको कमाइ यहि सञ्चार क्षेत्रमा लगाएको र बाँकी जीवन पनि यसैगरी बिताउने बताउनुभयो ।